Rruga për fitore!

Altin Rraklli, njëri ndër sulmuesit më të mirë që ka pasur kombëtarja kuqezi në histori të saj ka qenë mysafir në emisionin Dribling të Vizion Plusit ku ka folur për mundësitë e kombëtares në ndeshjen e nesërme ndaj Norvegjisë. 

“Gjithmonë kemi probleme me ekipet nordike, edhe kur kemi pasur ekip më të mirë se ky i sotmi ne kemi pasur probleme në lojë me ata. 

Norvegjezët luajnë ashtu që të nxjerrin gjithmonë problem. Mendoj që ky është rasti i fundit i kombëtares nëse ka synim kualifikimin. Nuk besoj që ka shqiptarë, përfshirë edhe trajnerin italian De Biasi, që të mos mendojë për kualifikim. 

Duhet të guxojmë atje. Nëse duam të bëjmë një hap të madh duhet të fitojmë ose në rastin më të keq, të marrim një pikë. Duhet të shkojmë me mentalitet fitues atje, e jo të themi, mirë është që të mos humbim. Duhet të kërkojmë fitore. Vetëm rrezikimi na sjellë së paku barazimin,” ka thënë Rraklli, sot 42 vjeçar, i cili ka qenë protagonist në ndeshjen madhore kur Shqipëria ka qenë gati t’i mund norvegjezët në Oslo, 15 vjet më parë. 

Shqipëria ndeshet nesër mbrëma me Norvegjinë në stadiumin Ullevaal të Oslos.