Shkarkimi i parë, pas 3 xhirove

Bruno Labadia 47 vjeçar është viktima e parë e rezultateve të dobëta në njërën ndër pesë ligat më të forta europiane në futboll. 

Skuadra që stinorin e kaluar arriti deri në finale të Kupës së Gjermanisë, Stuttgart, ka njoftuar në faqen zyrtare të saj se ka shkarkuar nga detyra trajnerin Labbadia, pas fillimit të keq të stinorit 2013/14 në Bundesligë. 

Stuttgart ka pësuar nga Mainz (3-2), Bayer Leverkusen (0-1) dhe Augsburg (2-1) në Bundesligë, derisa edhe pjesëmarrja në Europa League është në dyshim për shkak të humbjes nga Rijeka në ndeshjen e parë (2-1). 

‘Shvabat’ renditen në pozitën e parafundit të tabelës dhe humbja nga Augsburgu nuk është pranuar aspak mirë nga drejtuesit e skuadrës që kanë vendosur për shkarkim të menjëhershëm të trajnerit. 

“Stuttgart ka ndarë rrugët me kryetrajnerin Bruno Labbadia si dhe asistentin e tij Erdinç Sozer,” shkruan sot në faqen zyrtare të këtij klubi, derisa paralajmërohet edhe konferenca për shtyp gjatë ditës së sotme. 

Labadia, ish lojtar i Werder Bremenit, ka ushtruar detyrën e tij si trajner në Stuttgart që nga dhjetori i vitit 2010.