Shkëndija rehatohet në Milano

Futbollistët e ekipit tetovar, Shkëndija dhe stafi i ekipit kanë ateruar në Milano, ku i ka pritur autobusi zyrtar i ekipit.

Shpejt, ekipi ka arritur në hotelin Melia Milano, ku edhe janë akomoduar kuqezinjtë e Tetovës, ndërsa pas konferencës për shtyp sonte, zhvillohet seanca e fundit stërvitore para duelit në San Siro.

Për të arritur në Play-Off të Europa Ligës, Shkëndija ka eliminuar radhazi: Dacian molldave (7-0, rezultati pas dy ndeshjeve), HJK Helsinkin finlandez (4-2) dhe Trakain lituanez (4-2).

Shkëndija, edhe në stinorin e kaluar ka arritur në Play-Off të Europa Ligës, ku u eliminua nga rivali belg, Gent.

Kësaj radhe, shorti ka dashur që Shkëndijës t’i del përballë një ekip edhe më i njohur sesa Genti - AC Milan.