SKËNDERBEU

Panorama

Shpresa për histori

29 August, 2013 @9:15

Kampioni i Shqipërisë, Skënderbeu, sonte ndeshet në Qemal Stafa të Tiranës me Chornomoretsin e Odesës në kuadër të ndeshjeve të kthimit të Play-Offit të Europa League.

Korçarët kanë ngritur shpresat e tyre për kualifikim historik, pas humbjes me rezultat minimal në Ukrainë 1-0. Ndërsa vetëbesimin për një rezultat edhe më të mirë në Shqipëri u ka dhënë kapiteni Blendi Shkëmbi, i cili është rikthyer nga lëndimi që e detyroi të mos udhëtonte fare për ndeshjen e parë në Ukrainë.

Mungesa e sulmuesit më të mirë të stinorit të kaluar në Shqipëri, Pero Pejic, lë për të dëshiruar në sulmin korçar, mirëpo trajneri Mirel Josa mendon se ka zëvendësim të duhur me Mario Morinën dhe Andi Ribajn.

Te skuadra ukrainase ku luajnë dy shqiptarët, Kristi Vangjeli dhe Elis Bakaj, nuk ka dyshime që ata do të kualifikohen, e për më shumë, Bakaj, i cili është i lënduar ka thënë se “do të eliminojnë Skënderbeun”, e citon atë Panorama Sport sot.

Bastoret kanë favorizuar plotësisht ukrainasit duke u dhënë koeficientin për fitore 1.66, derisa Skënderbeu për fitore si vendas ka kuotën 5.50.

Skënderbeu ishte eliminuar në raundin e tretë të Ligës së Kampionëve nga Shakhter Karagandy (3-2; 0-3), prej nga kaloi në Play-Off të Europa League.

Në rast të kualifikimit të Skënderbeut në Europa League, korçarët do të jenë ekipi i parë që kanë arritur të futen në një garë europiane në histori të futbollit shqiptar.