KOMBËTARJA

Shqipëria në duel kritik

10 September, 2013 @9:23

Shqipëria shpreson se fatin që nuk e kishte në ndeshjen ndaj Sllovenisë katër ditë më parë, ta ketë sonte në ndeshjen ndaj Islandës.

Islanda në fushë do të del e moralshme pas barazimit 4-4 me lideren e grupit, Zvicrën. Në këtë ndeshje islandezët arritën ta përmbysin disavantazhin në 4-1 dhe me tre gola në pjesën e dytë u kthyen në shtëpi me një pikë.

Kurse Shqipëria e cila u mposht me rezultat minimal 1-0 ndaj Sllovenisë, ndoshta do të mund të bëjë diç më shumë sonte pasi që kundërshtari i sotëm nuk e ka në portë në gardian siç ishte Handanoviç i sllovenëve, i cili sikur ndërtoi një mur para portës së tij.

Për ndryshe, që të dy skuadrat, si Shqipëria, ashtu edhe Islanda, do të luajnë për fitore. Që të dy skuadrat kanë tubuar nga 10 pikë deri më tani dhe barazimi nuk do t’i kishte konvenuar asnjërës.

Dy sulmues në formacion

Trajneri italian i kuqezinjëve, Gianni De Biasi, pritet të luaj me formacionin 4-4-2, ndryshe nga formacioni ndaj sllovenëve që ishte 4-5-1.

Edgar Çani, i cili mbeti shumë i vetmuar ndaj Sllovenisë, pritet të shoqërohet në sulm nga Hamdi Salihi. Ky ndryshim me shumë gjasë do ta lë në bankë Ervin Bulkun, ndërsa do të luhet me dy shkatërues në mesfushë, Kaçe-Basha.

Mesfushorët e krahut pritet të jenë të paprekshëm, Rama në të majtë e Roshi në të djathtë, sikurse edhe mbrojtja që do t’i besohet dyshes Cana-Teli.

Dilma më e madhe është te mbrojtësit anësor. Agolli është i suspenduar për shkak të kartonit të verdhë dhe nuk do të ketë të drejtë loje sonte. Në vend të tij mund të zhvendoset Andi Lila, ndërsa në të djathtë mund të luaj Armend Dallku. Megjithëse ky variant ka më shumë gjasë që të përdoret nga De Biasi, në opcion janë edhe dy mbrojtësit anësor, Renato Arapi dhe Elseid Hysaj.