Sillnani Dortmundin!

Me fitoren e djeshme ndaj Atalantas 2-0, Napoli ka mbajtur rekordin e qindpërqindtë në Serie A dhe tani mbetet skuadra e vetme (nëse Roma nuk fiton sot) me bilanc 3 ndeshje - 3 fitore. 

Gonzalo Higuain dhe Jose Callejon, ish dyshja e Real Madridit kanë shënuar golat në minutat 71’ dhe 81’ për napolitanët, ndërsa pas ndeshjes argjentinasi Higuain bashkë me Blerim Xhemajlin kanë thënë se nuk i frikësohen aspak sfidës së ardhshme të skuadrës së tyre ndaj Borussia Dortmundit në Ligë të Kampionëve. 

“Nuk frikësohemi nga Borussia Dortmund. Ata janë një ekip shumë i mirë, por ne jemi ekip që nuk lëshojmë pe në San Paolo. Ne do të bëjmë gjithçka çka duhet për të arritur daljen nga grupi,” ka thënë Blerim Xhemajli pas ndeshjes. Xhemajli ka asistuar në golin e dytë të Napolit të shënuar nga Callejon, ndërsa ka qenë në fushë deri në minutën e 85-të të ndeshjes. 

“Një ditë para ndeshjes do të diskutojmë për Dortmundin, nuk mendoj se do të ketë ndonjë problem,” ka thënë Higuain gjithashtu pas ndeshjes. 

Napoli aktualisht ka maksimumin e pikëve në Serie A, ndërsa të mërkurën takohet me nënkampionin aktual të Europës, Borussia Dortmund, në kuadër të Ligës së Kampionëve. Me Napolin dhe Dortmundin në grup janë edhe Arsenal dhe Olympique Marseille.