Sonte fillon elita franceze

Ermir Lenjani dhe Lorik Cana do të vazhdojnë të qëndrojnë në Francë edhe gjatë vjeshtës. Derisa të dy do të kenë konkurrencë të madhe për të qenë startues, Stade Rennes i Lenjanit duket më afër të përfundoj në pjesën e epërme të renditjes.
Një problem kryesor për Ligue 1 është që vetëm katër pozitat e para kanë rëndësi. E pesta dhe e gjashta janë opsionale, varësisht nëse PSG vendos të fitoj edhe kupën dhe kupën e ligës në hakmarrje për mossuksesin në Ligën e Kampionëve.

PSG besoj që do të mbetet ekipi që do të përcaktoj ligën e Francës edhe këtë vit. E vetmja mangësi tek skuadra e sheikëve, tashti që kanë edhe trajner të mirë, është mungesa e sulmuesit rezervë. Cavani nuk mund të mbuloj i vetëm atë pozitë dhe mund të presim një 9sh gjatë javëve të mbetura. Më së shumti gjasa për të ardhur ka Lacazette i Lyonit.

DUELET E XHIROS I

Edhe nëse e shesin atë, Lyon s’do të mbetet keq në sulm falë Ghezzal e Fekir. Edhe pjesa tjetër e fushës tek skuadra e Aulas është mirë e mbuluar. Mammana e Tolisso janë dy emra që do të duhej të shpërthenin këtë vit. Megjithatë për Lyonin një kualifikim direkt në Ligën e Kampionëve dhe një kalim eventual i grupeve do të ishte sukses.

Monaco ka ekip edhe më të mirë, por rrallëkush që mund të shtyhet me kontinuitetin e PSG. Në mbrojtje tash kanë edhe Glikun me Jemerson, Fabinho, e Mendy për të bërë një linjë të mirë. Moutinho, Silva, Lemar, e Traore janë për mesfushë, mbrapa Falcaos e Carrillos. S’janë të dobët, por edhe s’janë për kampion.

Në fakt askush nuk mund të marr titullin e kampionit nëse është i angazhuar në Evropë. Këtë gajle nuk e ka Marseille tash e sa vite. Por, Olympique maksimumin që mund të synoj me një skuadër ku kanë Gomisin e Abou Diabyn si lider do të ishte Top6. S’janë pa talente – Rekik, Sakai, Thauvin, N’Koudou, e Leya Iseka. Por, ju duhet kohë.

TABELA

St. Etienne e ka atë problemin për thyerjen e katërshes së parë. Gjithmonë janë afër, por në momentin që afrohen nisin të dështojnë dhe mbeten vetëm për Europa League. Më shumë besoj që e kanë problemin në pankinë se sa në fushë. Është koha për të larguar Christophe Galtier.
Skuadër të talentuar ka edhe Bordeaux, por jo të gatshme për të thyer katërshen e parë. Nice do të nisin sezonin me Lucien Favre, derisa interesante do të jetë të shohim si do të nisin sezonin Angers e Caen kësaj radhe. Gjithashtu Dijon kthehet në Ligue 1 për herë të dytë. Gjithçka nën 60 golat e sezonit 2011-12 do të ishte sukses.

Bashkë me Dijonin jashtë Ligue 1 vitin e ardhshëm e shoh edhe Metzin dhe Bastinë. PSG kampion, me Monacon dhe Lyonin në dy pozitat tjera për Ligën e Kampionëve. Tri pozitat vijuese të ndara ndërmjet Rennes, St. Etienne, e Bordeaux.