JUVENTUS - AJAX
Super Ajax, pas Realit, eliminon Juventusin!
16 April, 2019 @23:09
Befasia e mbrëmjes ka ndodhur në Torino!
Një ndeshje që nisi me Juventusin favorit pas rezultatit 1-1 në Holandë, u mbyll me fitoren e Ajaxit, skuadër kjo që në rrethin e kaluar e kishte eliminuar Real Madridin, ndërsa sonte dhuroi një tjetër spektakël, duke e mposhtur kampionin e Italisë në shtëpinë e tij!
Edhe ballafaqimi i zhvilluar sonte në Torino filloi mirë për “Zonjën e Vjetër”. Një gol i Cristiano Ronaldos në minutën e 28’ mendua se do ta çonte Juventusin qetësisht në gjysmëfinale, mirëpo holandezët reaguan shpejt.
Fillimisht për 1-1 shënoi Van de Beek në minutën e 34’, e më pas një gol i De Ligt në pjesën e dytë, bashkë me një super paraqitje ekipore, bëri që Ajaxi ta mbyllë me fitore 1-2 takimin e sotëm, rezultat i cili e dërgon këtë skuadër në mesin e katër skuadrave më të mira evropiane.
Në gjysmëfinale, Ajax pret fituesin e përballjes mes Cityt e Tottenhamit, fitues të cilin do ta kuptojmë nesër mbrëma.
