Të marrim mësim

Trajneri i Feronikelit, Zekirija Ramadani, në deklaratën e tij pas fitores së sotme ndaj Ferizajit ka thënë se ekipi duhet të merr mësim nga ndeshja e kaluar dhe të luajë si sot e të aplikojë këtë në duelin e radhës.

“Pjesën e parë e kishim në dominim. Poseduam topin, krijuam raste dhe shënuam dy gola. Kishim rast për të shënuar edhe golin e tretë. Ia tërhoqa vërejtjen lojtarëve për pjesë të dytë se Ferizaji do të sulmojë, por arritëm ta ruajmë rezultatin. Kjo ka treguar karakterin e skuadrës. Natyrisht, jemi njerëz, humbëm javën e kaluar dhe pas pauzës që kemi duhet të fitojmë ndaj Dritës. Kjo do të jetë edhe një ndeshje e vështirë, ngase do të luajmë ndaj kampionit aktual,” ka thënë tekniku i Feronikelit sot.

Feronikeli humbi ndeshjen e mbetur ndaj Prishtinës për të humbur kreun e klasifikimit në javën që shkoi. Sot ka treguar se është ekip i fortë dhe është këndellur plotësisht, ndërsa në xhiron që vjen takohet me kampionin aktual, Dritën.