Tre serbët e Slovanit, qeveria serbe s’i lejon ndaj Feronikelit

Futbollistët serb të Slovan Bratislavës, Aleksandar Cavric dhe Dejan Drazic, bashkë me trajnerin Vladimir Radenkovic kanë respektuar kërkesën e qeverisë serbe lidhur me ndeshjen ndaj kampionit të Kosovës, Feronikeli.

Kështu, treshja nuk do të paraqitet në përballjen që Slovan e luan sonte ndaj Feronikelit, ndërsa ekipi do të drejtohet nga ndihmës-trajneri Jan Kozak.

“Klubi kërkon mirëkuptim nga tifozërisa për këtë vendim të lojtarëve, për shkak të situatës së krijuar,” ka shkruar ndër të tjera njoftimi zyrtar i klubit të Slovanit.

Slovan - Feronikeli nis në ora 18:00 sot, ndërsa i takon raundit të dytë kualifikues të Europa Ligës, pasi që të dy kampionët e vendeve përkatëse nuk kanë arritur të kalojnë raundin e parë kualifikues të Ligës së Kampionëve.

Kështu, shteti serb, pasi që nuk po mund të ndal përparimin e Kosovës në arenën ndërkombëtare - po i ndal sportistët e vet për tu paraqitur në përballje ndaj ekipeve apo shtetit të Kosovës.

Kujtojmë, Mali i Zi kishte mbetur pa trajnerin serb dhe pa disa lojtarë para përballjes zyrtare kualifikuese ndaj Kosovës për EURO 2020.