Feronikeli ndaj humbësit Dundalk-Qarabag, nëse kalon raundin e dytë

Skuadra e Feronikelit ka mësuar kundërshtarët e mundshëm që e presin në raundin e tretë kualifikues të Europa Ligës, nëse e kalon pengesën e raundit të dytë.

Përballjet që do t’i zhvillojë Feronikeli me Slovanin e Bratisllavës janë përcaktuese për të ardhur te kundërshtari i fazës së tretë kualifikuese, ku i pret humbësi i ndeshjes Dundalk (Irlandë) - Qarabag (Azerbajxhan).

Slovan - Feronikeli luhet më 24 korrik në ora 18:00, ndërsa Feronikeli - Slovan luhet më 30 korrik në ora 18:00. Fituesi i përballjes, ndeshet me humbësin e sipërpërmendur.

Në anën tjetër, Shkëndija nëse kalon Dudelangen do të përballet me humbësin e Celtic - Nomme Kalju.

Kurse Partizani i Tiranës nëse kalon pengesën Sheriff të Molldavisë, do të ndeshet me humbësin e përballjes Maribor (Slloveni) dhe AIK (Suedi).

Kujtojmë, të trija këto ekipe kanë qenë pjesë e Ligës së Kampionëve dhe nuk kanë arritur të kalojnë raundin e parë kualifikues aty.

Sistemi i garave, ua mundëson kampionëve të vendeve të UEFA-së, edhe një mundësi kualifikimi, por tashmë në Europa Ligë.