EKIPET SHQIPTARE NË #UEL
Teuta fiton, Kukësi barazon, Laçi lufton, Shkupi befasohet - krejt eliminohen
18 July, 2019 @23:40
As në Europa League, asnjë ekip shqiptar nuk ka arritur të kalojë në raundin e dytë kualifikues.
Teuta fitoi 1-0 ndaj Ventspilsit letonez sonte në Durrës, por pamjaftueshëm për të shkrirë rezultatin 3-0 nga ndeshja e parë. Ventspils shkon tutje, ndërsa goli i Sherif Kallakut do të mbetet vetëm për statistikë dhe për disa pikë për ligën shqiptare në renditjen e UEFA-së.
Kukësi ka barazuar ndaj ekipit të Debrecenit hungarez 1-1 sonte, por humbja prej 3-0 në përballjen e zhvilluar në Hungari çon mysafirët përpara.
Laçi ka qenë ekipi që ka luftuar më së shumti, por assesi të arrijë te goli sonte në Izrael. Hapoel Beer Sheva fitoi 1-0 ndaj Laçit, që kishte barazuar 1-1 në Shqipëri, dhe kështu përshëndetet nga garat evropiane.
E Shkupi është befasuar keq në shtëpi. Pas paraqitjes së mirë në Armeni ndaj Pyunikut, ku kishte fitoren në duar dhe në fund barazoi 3-3, sonte në Shkup si vendas u mposht nga armenët 1-2 dhe u eliminua.
Kështu, të gjitha ekipet shqiptare pjesëmarrëse në Europa Ligë u përshëndetën nga gara.
Ndërsa të gjitha ekipet shqiptare të eliminuara nga raundi i parë i kualifikimeve të Ligës së Kampionëve, do të marrin pjesë në raundin e dytë kualifikues të Europa Ligës: Feronikeli, Partizani dhe Shkëndija.