Van’t Schip: Do të vendosin detajet

Përzgjedhësi holandez i Greqisë, Johann Van’t Schip, ka thënë se përkundër se e njeh Kosovën dhe ka rezultate pozitive nga dy ndeshjet e kaluara, kjo ndeshje do të jetë krejt tjetër.

Schip ka shtuar se përballjen do ta vendosin detajet, pasi që të dyja ekipet po luftojnë për pikët e plota në këtë ndeshje dhe gjasat për kualifikim mbahen vetëm nëse luftohet për fitore.

TABELA AKTUALE dhe ORARI I NDESHJEVE

“Për ne secila ndeshje sipas radhës është më e rëndësishmja. Kemi luajtur dy herë me Kosovën, por nuk e kisha krahasuar atë Kosovë me këtë Kosovë. Kjo pasi që ata tash mund të kenë lojtarë tjerë në dispozicion, sikurse edhe ne. Për ne është me rëndësi të ndjekim planin tonë të lojës dhe të shkojmë drejt fitores. Nuk jemi shumë të fortë siç po thuhet, se sa jemi të fortë duhet ta tregojmë në fushë. Do të jetë ndeshje e vështirë,” ka thënë fillimisht holandezi pranë mediave në Fadil Vokrri.

Gjithashtu, mungesa e Tziolisit konsiderohet të jetë e rëndësishme për ndeshjen.

“Po, ai është lënduar. Tash po kalon fazën e shërimit dhe shpresojmë ta kemi të gatshëm për ndeshje me Suedinë. Sidoqoftë, ka lojtarë tjerë që do t’ia besojmë detyrën dhe të ecim përpara,” është përgjigjur shkurt përzgjedhësi i grekëve.

Më pas, Schip ka shtuar se ka rishikuar ndeshjen e fundit të Kosovës ndaj Gjeorgjisë dhe kur u pyet për lojën e treguar ai u përgjigj përgjithësisht kujdesshëm dhe matur.

“E kam shikuar dhe e kemi shikuar ndeshjen. I njohim mirë. Kemi luajtur dy herë ndaj Kosovës dhe është treguar ekip i fortë. Mbrohen mirë dhe sulmojnë shpejtë me linja direkte. Kanë vrapues në ekip dhe janë zhvilluar mirë si kombëtare. Ne duhet të përcjellim planin tonë të lojës, ta çojmë tutje dhe të nxjerrim rezultatin pozitiv,” ka thënë ndër të tjera Schip.

TABELA AKTUALE dhe ORARI I NDESHJEVE

Rëndësia e kësaj ndeshjeje?

“Patjetër të fitojmë. Nëse dëshiron të konkurrosh grupin, të mbetesh në lojë përgjatë kualifikimeve duhet të fitosh, të luash bukur dhe të marrësh pikë. Ndryshe, nuk shkon,” vendosmërisht ka thënë ai.

Sa i përket duelit të nesërm, se si do të vendoset ajo dhe çka pret përzgjedhësi, Schip ka treguar se detaji më i vogël do të vendosë.

“Kosova është rritur si ekip, por edhe ne. Detajet besoj që do ta vendosin lojën. Kush bën më pak gabime, ai do të fitojë. Në futboll vendos një vendim momental, një detaj, një gabim minimal. Ne do të koncentrohemi dhe të fokusohemi në ndeshje, për të nxjerrë gjithçka sipas planit tonë në lojë,” ka thënë ai në fund.