Vëllaznimi kthehet në Gjakovë si lider

Skuadra e Vëllaznimit, duke e mposhtur Lirinë me rezultat minimal 0-1, bëhet lider i ri i Grupit A në Ligën e Parë.

Golin e vetëm në ndeshje shënoi Donati Toma në minutën e 35’ të ndeshjes.

Liria në minutën e 75’ mbeti pa lojtarin Ragip Thaçi, i cili u ndëshkua me kartonin e dytë të verdhë.

TABELA AKTUALE

Vëllaznimi me këtë fitore ngritet në krye të Grupit A në Ligën e Parë, kurse Liria me 2 pikë gjendet në pozitën e nëntë.

Pas golit të pranuar, Liria iu vërsul më shumë portës së gjakovarëve, por pos një goditjeje mbi portë dhe disa gjysmërasteve, tentime më serioze nuk kishte.

Në anën tjetër, Vëllaznimi shfrytëzonte çdo duel të fushës për të humbur minuta në ndeshje, për të çuar edhe më lartë nervat e vendasve, që kërkonin golin e barazimit.

Gjithsesi, Toma në pjesë të parë me një pranim asistimi nga Albin Prapashtica, ka qëlluar mjeshtërisht portën e Drilon Hodajt për fitore (35).

Ndërrimet e pjesës së dytë te Liria që drejtohet nga Gzim Hasi dhe nuk ka ende fitore në Ligë të Parë, as pas katër xhirosh, nuk sollën fryt.

Në anën tjetër, Vëllaznimi me trajnerin Gentrit Begolli lidershipin e feston me një grup bukur të mirë tifozësh që kishin udhëtuar në Përparim Thaqi, për të përkrahur ekipin karshi vendasve të heshtur në tribuna e të humbur në fushë.