Zëvendësuesi Firmino në minutën e fundit vendos Liverpoolin në finale

Sulmuesi brazilian i Liverpoolit, Roberto Firmino, ka shënuar golin e fitores për ekipin e tij, në fund të ndeshjes, vetëm 5 minuta pasi që hyri në lojë, për t’ia dhënë skuadrës fitoren ndaj ekipit meksikan Monterrey dhe për ta vendosur ekipin e tij në finalen e Kupës Botërore për Klube.

Firmino, që zëvendësoi Divock Origin në minutën e 85-të të ndeshjes, shënoi nga afërsia për 1-2 [Funes Mori 14 - Keita 11, Firmino 90] pas një krosimi të Trent Alex-Arnoldit në Doha të Katarit, ku po zhvillohet FIFA Botërori i klubeve.

Naby Keita kishte shënuar për 0-1 në të mirë të Liverpoolit, pas një pasimi të shkëlqyeshëm nga Mohamed Salah, para se Rogelio Funes Mori të barazonte për meksikanët në 1-1.

Xherdan Shaqiri ishte në formacionin startues te Liverpooli dhe luajti për 68 minuta lojë, derisa Klopp vendosi që ai të zëvendësohet nga senegalezi Sadio Mane.

Të kuqtë e Jurgen Kloppit do të ndeshen në finale me brazilianët e Flamengos të shtunën, për trofeun e fundit për klube këtë vit. Flamengo ditë më parë mposhti arabët e Al-Hillait 3-1 [de Arrascaeta 49, Bruno Henrique 78, Ali Albulayhi AG 81 - Salem al Dawsari 18].