‘89shi me fitore të madhe para pushimit

Trepça’89 me lojë të mirë të treguar sot në Riza Lushta, ka arritur të mposht njërin nga ekipet favorite për titull kampioni këtë stinor, Dritën, 3-1.

Mitrovicasit kanë ardhë shpejt në epërsi, pasi që një tentim i Izair Eminit të Dritës në minutën e shtatë shkoi huq.

Ka qenë Leart Emini (17’) që ka dhënë gol për epërsinë 1-0 të Trepçës’89. Ai ka shfrytëzuar më së miri një top të ardhur në zonë, prej ku ka realizuar.

E derisa Drita tentonte të organizonte lojën për tu kthyer në ndeshje, mitrovicasit janë treguar ‘vrasës’ në anën tjetër, kur shutin e Muharrem Jasharit e devijon pa dashje Ardian Cuculi i Dritës për 2-0 (45’) në të mirë të vendasve.

TABELA AKTUALE E SUPERLIGËS

Jashari bëhet protagonist edhe në nismë të pjesës së dytë. Ai shënoi një gol të bukur në minutën e 53-të të ndeshjes për 3-0 dhe tashmë, dilema për fituesin nuk kishte. Ekipi i Shpëtim Idrizit po shkonte drejt fitores.

Ndërsa e tëra që arriti Drita e drejtuar nga Ardian Nuhiu ka qenë goli i nderit, shënuar nga zëvendësuesi brazilian, Gilberto Fortunato, që tundi rrjetën e Ardit Hysenit (63’) për përfundimtaren 3-1.

Pikët kanë qenë jashtëzakonisht të rëndësishme për Trepçën’89, që ka mbajtur distancën 4 pikëshe ndaj ekipeve të zonës së rrezikshme të klasifikimit. Kurse gjilanasit kryejnë pjesën vjeshtore të stinorit në pozitë të tretë.