MALISHEVA 0-1 DRITA
Ardit Tahiri vendimtar, Drita njofton me humbje Malishevën
11 September, 2021 @18:33
Skuadra e Malishevës që është duke e përjetuar sezonin debutues në Superligë, sot është njoftuar me humbjen e parë të saj aty, pasi që u mposht nga Drita në Liman Gegaj me rezultat minimal, 0-1 [Ardit Tahiri 83].
I posaardhuri nga Besa e Pejës, përsëri është treguar vendimtar te ekipi i Ardian Nuhiut, pasi që ka shënuar shtatë minuta para fundit të ndeshjes për t’ia sjellë fitoren e dytë të stinorit ekipit të tij të ri.
E ndeshja nisi me raste, ku së pari rrezikoi Gentian Binishi për vendasit, e më pas edhe Marko Simonovski për mysafirët. Por, gol s’kishte në pjesën e parë.
Në pjesë të dytë Muhamed Hyseni (49) goditi shtyllën për vendasit, për t’i ngrirë për një moment gjilanasit. Por, Drita u kundërpërgjigj me mesfushorin nga Shqipëria, Erjon Vucaj, që tronditi shtyllën e vendasve. Përsëri pa gol.
E në fund, në skenë doli i riu i talentuar Ardit Tahiri, që shënoi për epërsinë e Dritës, kurse pas pesë minutave shtesë të dhëna nga referi kryesor, rezultati nuk ndërroi dhe kështu Drita kap shtatë pikëshin pas tri xhirove për të qenë në bashkëkryesim sa i përket pikëve, e Malisheva tashmë ka shijuar gjithçka në Superligë, fitoren, barazimin dhe me sot, edhe humbjen.
