Cristiano i 2016shit!

Me gjithë karrierën e bujshme që e ka pasur deri më tani, viti 2016 do të jetë një nga vitet më të kujtuara në jetën e Cristiano Ronaldos!

Me hat-trickun e shënuar ndaj Atleticos të shtunën, portugezi e ka kompletuar hat-trickun e 39 me Real Madridin, ndërsa ishte tregolëshi i tij i gjashtë në vitin kalendarik 2016.

Në 50 ndeshje të luajtura me klub dhe kombëtare në këtë vit, Cristiano ka shënuar 49 gola dhe ka dhuruar 17 asistime. Këto statistika janë kurorëzuar me 3 tituj ekipor: Champions League dhe Superkupa e Evropës(edhe pse Ronaldo ishte i lënduar) me Realin dhe titulli i kampionit të Evropës me Portugalinë në EURO2016.

Sa i përket çmimeve individuale, Ronaldo u shpall golashënuesi më i mirë i sezonit 2015/2016 në Champions League si dhe e fitoi çmimin ‘UEFA Lojtari më i mirë në Evropë’.

Deri në fund të vitit, Ronaldo mund ta fitojë edhe një titull, atë të ‘International Cup’ me Real Madridin, garë në të cilën klubi madrilen takohet me kampionët e kontinenteve tjera për titullin e klubit më të mirë nga e gjithë e bota. Kjo garë zhvillohet në dhjetor, ndërsa ‘qershia mbi tortë’ do të ishte fitimi i ‘Topit të Artë’ në ceremoninë që mbahet në janar. Edhe për këtë titull Ronaldo është favoriti kryesor.