Drita ndal Prishtinën

Prishtina nuk ka arritur të vazhdojë me ritmin e fitoreve në Superligë.

Bardhekaltërit që janë duke ndjekur Feronikelin në krye të klasifikimit të Superligës, janë ndalur sot në Gjilan nga kampioni aktual i Superligës, Drita, duke barazuar 1-1.

Pas tetë fitoreve radhazi Prishtina ka barazuar dhe atë vetëm falë gjiindshmërisë së Gauthier Mankendës, që shtyu në portë një krosim të Armend Thaqit në minutën e 56 të ndeshjes për të barazuar 1-1.

Armend Thaqi në pjesë të parë të ndeshjes kishte ndalë në zonë Betim Haxhimusën, për tu akorduar penallti për Dritën. E Fidan Gërbeshi ka qenë i saktë nga 11 metra për t’i dhënë epërsinë gjilanasve 1-0 (14’).

Me këtë barazim, Prishtina tre xhiro para fundit të stinorit është dy pikë larg Feronikelit lider.

Në anën tjetër, Drita duket të ketë vulosur pozitën e katërt këtë stinor në Superligë.

Në xhiron që vjen, Drita i shkon liderit, Feronikeli, ndërsa Prishtina pret Llapin në derbin tjetër.