FFK fton gjyqtarët e rinj

Me një komunikatë të lëshuar për media, Federata e Futbollit të Kosovës (FFK) ka bërë të ditur se kërkon gjyqtarë të rinj, femra dhe meshkuj, që të aplikojnë për mësim të kësaj zejeje.

“Komisioni i gjyqtarëve i cili është organ i Federatës së Futbollit të Kosovës, gjithnjë është në kërkim të rekrutimit të gjyqtarëve të rinj, femra dhe meshkuj. Kurset për gjyqtarë mbahen nga Shoqatat Regjionale të gjyqtarëve të cilat janë nën juridiksionin e Komisionit të gjyqtarëve. Pasi që gjyqtari ta kompletojë kursin në mënyrë të kënaqshme, ai do të jetë në gjendje të përparojë përmes sistemit. Për më tepër, nëse arrin progres të vazhdueshëm gjatë viteve, mund të futet edhe në listën e Gjyqtarëve apo Asistentëve të FIFA-s, e cila i jep mundësi që të referojë ndeshje në të gjitha pjesët e Evropës dhe kohë pas kohe edhe ndonjë pjesë tjetër të botës,” ka shkruar FFK-ja, duke bërë të ditur edhe kriteret për aplikim.

“Kriteret të cilat duhet të plotësohen nga kandidatët për gjyqtarë, në mënyrë që të ftohen në testet fillestare janë si në vijim:

-Duhet të jeni më i ri se 16 vjeç. Nëse ka qenë futbollist aktiv, ai duhet të jetë më i ri se 25 vjeç. Mirëpo, lejohen përjashtime për raste të cilat vlerësohen nga Komisioni i Gjyqtarëve,
-Të jetë në gjendje të mirë fizike dhe shëndetësore,
-Të ketë të përfunduar shkollimin e mesëm apo të jetë duke e vazhduar shkollimin,
-Të ketë të kaluar të pastër kriminale.

Secili person, i cili dëshiron të bëhet gjyqtar duhet t’i dërgoj të dhënat në emailin: [email protected],” ka bërë të ditur FFK.