1/8: PSG - REAL MADRID
Fiton edhe në Francë, Reali eliminon Parisin
6 March, 2018 @22:39
Me fitoren e spanjollëve është mbyllur edhe takimi kthyes mes Parisit dhe Realit.
Edhe pse pritej që Parisi të tregohej skuadër më sulmuese, kur dihej rezultati i ndeshjes së parë, parisienët nuk treguan edhe aq të rrezikshëm para portës kundërshtare, duke shfaqur paraqitje të zbehtë, ndoshta të ndikuar edhe nga mungesa e brazilianit Neymar.
Në anën tjetër, Reali në avantazh nga ndeshja e parë dhe edhe pse në mungesë të dyshes Kroos-Modric në formacionin startues, provonte të rrezikonte përmes kundërsulmeve dhe kjo rezultoi suksesshëm. Për epërsinë 0-1 dhe pothuajse vulosjen e kualifikimit u përkujdes i zakonshmi Cristiano Ronaldo, për të cilin ky ishte goli i 12 në 8 ndeshjet e zhvilluara sivjet në Champions. Madje, ai ka shënuar në të gjitha këto 8 ndeshje minimalisht nga një gol.
Më pas, përkundër përjashtimit të Verrattit, vendasit e gjetën barazimin e përkohshëm përmes Cavanit, por ishte Casemiro ai që shënoi për 1-2 dhe takimi u mbyll me fitoren e kampionit në fuqi të Evropës.
Kështu, Reali dhe Liverpooli janë dy çerekfinalistët e parë të edicionit të sivjetëm të Ligës së Kampionëve, derisa Parisi i ‘super investimeve’ përsëri dështon para ‘fuqive të mëdha’.