Humbja e parë europiane e Lazios

Lazio ka pësuar disfatën e parë këtë stinor në gara europiane. Shkaktar i humbjes së lacialëve ka qenë kampioni bullgar, Ludogorets, që ka qenë shumë i mirë sonte, derisa me një gol të vetëm të Roman Bezjak kanë arritur që të shënojnë fitore tejet të rëndësishme në Romë. 

Cana shkakton, Berisha shpëton

Lazio ka nisur mirë takimin, por pas një loje me dorë të Lorik Canës, referi i ndeshjes akordoi penallti. Mirëpo, tentimin e stilit Panenka, të Svetoslav Dyakovit, edhe pse në fillim i mashtruar, me reflekse maceje, e ka mbrojtur portieri prishtinas i romakëve, Etrit Berisha.

Kjo i dha zemër biancocelestëve të cilët filluan të sulmonin më seriozisht. Por në anën tjetër Vladislav Stoyanov, portieri i Ludogorets bënte magji, duke mbrojtur gjithçka. Ai bile në pjesën e dytë mbrojti edhe një penallti të Lazios, të cilën dështoi ta shënonte braziliani Felipe Anderson. 

Stoyanov, yll i ndeshjes

E Lazio kah fundi përkundër sulmeve të shumta, që hasnin te Stoyanov i mrekullueshëm, nuk arriti të shënojë. Derisa bullgarët me kundërsulme mbetën duke kërkuar së paku dy penallti nga faulet e Mickael Cianit të Lazios, por që referi gjerman - nuk i gjykoi. 

Humbje pas 10 muajsh

Javën tjetër Cana dhe Berisha do të jenë në Sofje për ndeshjen e kthimit ku do të duhet të shënojnë fitore me së paku dy gola epërsi për të siguruar të tetën e finales së Europa League. 

Lazio nuk ka humbur mbi 10 muaj në Europa League, prej se kishin humbur nga Fenerbahçe 2-0 në prill të stinorit të kaluar.