Pas 9 vitesh, Chelsea arrin finalen e tretë

Nëntë vite pasi që kishin ngritur për herë të parë trofeun e Ligës së Kampionëve duke e mposhtur Bayern Munchenin në finale, Chelsea ka arritur përsëri në hapin e fundit të garës më të rëndësishme të futbollit ekipor.

Londinezët me dominim në fushë dhe duke mos i lënë rast konkret Real Madridit, kanë shënuar fitore 2-0 [Werner 28, Mount 85] në ndeshjen e kthimit në Stamford Bridge, për të arritur finalen e tretë në histori të klubit.

Reali përgjatë ndeshjes befasisht nuk arriti të krijojë fare, derisa treshja e dalluar e mesfushës së tyre (Luka Modric, Casemiro, Toni Kroos) nuk funksionoi karshi Ngolo Kantesë fantastik si dhe Mason Mountit këmbëngulës dhe kreativ. Me këtë, rekord-kampioni evropian i jep fund garave ndërkombëtare për këtë sezon, duke u ndalë në gjysmëfinale, përkundër se iu kthye qendërmbrojtësi i dalluar, Sergio Ramos.

Kështu, Chelsea ka siguruar finalen e Ligës së Kampionëve 2020/21 ndaj Manchester Cityt, ku këta të fundit kanë arritur për herë të parë aty.

Ekipi i drejtuar nga Thomas Tuchel ka kaluar shumë më lehtë sesa që pritej ndeshjen e kthimit sonte, pas barazimit në duelin e parë në Alfredo di Stefano, 1-1.

Tash, finalja në Stamboll me 29 maj - është angleze.