NAPOLI-ROMA
Roma prish serinë e Napolit
3 March, 2018 @23:03
Me fitore të thellë, 2-4, Roma ka dalë triumfuese nga San Paolo i Napolit sonte, ndërsa ka bërë edhe më interesant luftën për titull në Itali, derisa Napoli lider, tashmë është vetëm një pikë larg Juventusit ndjekës.
Forma tejet e mirë e lojtarëve të Maurizio Sarrit, që nuk dinin për humbje në Serie A që nga 1 dhjetori i vitit të kaluar është prishur sonte, pas katër muajve dhe pas 11 ndeshjeve në elitë.
Epërsia e hershme e Napolit u shua nga turku Cengiz Under edhe më shpejtë. E më pas, golat e boshnjakut Edin Dzeko përcaktuan fituesin e ndeshjes, 1-3, para se Diego Perotti të shënonte për 1-4, 11 minuta para fundit.
Belgu Dries Mertens shënoi për përfundimtaren 2-4 në fund, ndërsa Napoli tash pas eliminimit nga garat europiane dhe Kupa e Italisë, mund të rrezikojë seriozisht edhe luftën për titull, pasi që xhiron tjetër është mysafir i Interit.