Shearer pas fitores: Më lehtë si lojtar sesa tifoz

Njëri ndër sulmuesit legjendar të Anglisë, Alan Shearer, që tashmë është tejkaluar nga Harry Kane për numrin e golave të shënuara në turne madhore, ka folur për programin e mëngjesit të BBC-së sot.

Shearer që ishte kthyer në shtëpi rreth orës 4 të mëngjesit sot, pas festës së mbrëmshme ka thënë se arritja e “këtyre djemve” është e jashtëzakonshme dhe këtë s’mund ta arrijë secili.

“Këta djemë kanë bërë gjithçka më mirë se ne në vitin 1996. Ata arritën diçka që shumë njerëz nuk e arrijnë. Kanë qenë kohëra të mira ato, por ne nuk arritëm t’i tejkalojmë penalltitë. I prita penalltitë edhe ndaj Danimarkës, por falë fatit erdhi goli dhe nervat u qetësuan, pasi që është shumë më lehtë të jesh futbollist në fushë sesa tifoz në tribuna,” ka thënë ish-lojtari i Newcastle.

“Isha në tribuna me Gary Linekerin dhe Jurgen Klinsmannin dhe të 3 u pajtuam që shumë më lehtë është të jesh në fushë dhe sa e neveritshme dhe stresuese është të jesh tifoz. Ti qëndron në tribuna dhe asgjë s’mund të bësh. Ndërsa si lojtar së paku mund të kontrollosh sadopak gjërat në fushë,” ka shtuar ai ndër të tjera.

Anglia me fitoren e mbrëmshme ndaj Danimarkës ka siguruar finalen e parë të një Kampionati Evropian dhe Gareth Southgate selektor me ekipin e tij kanë arritur historinë.

Në finale, më 11 korrik me fillim prej orës 21:00 Anglia ndeshet me Italinë në Wembley, duke kërkuar tash edhe trofeun e parë të EUROs në histori.