ANGLIA - DANIMARKA
![Angli historike, finalja e parë e EUROs arrihet në vazhdime Angli historike, finalja e parë e EUROs arrihet në vazhdime](https://topsporti.com/images/uploads/_new_article_sans/Kane_Harry_celeb_w_England_team_goal_jul2021.jpg)
Angli historike, finalja e parë e EUROs arrihet në vazhdime
7 July, 2021 @23:46
Anglia ka arritur të sigurojë finalen e parë dhe historike të vendit, duke eliminuar Danimarkën pas 120-minutave lojë në gjysmëfinale.
Në finale, Anglia do të ndeshet në finale ndaj Italisë më 11 korrik 2021 në Wembley, në një përballje që pritet të jetë qershia mbi tortën e evropianit.
Një ndeshje e matur, me një epërsi daneze të arritur nga gjuajta e lirë dhe që mund të thuhet se anglezët pos disa gjysmërasteve, nuk i dhanë shumë mundësi Danimarkës entuziaste në sulm.
Në anën tjetër, matematikisht të llogaritur dhe stabil thuajse në secilin repart, anglezët pas barazimit të shpejtë u qetësuan dhe kontrolluan lojën.
Në pjesë të dytë, rastet e anglezëve i mohoi njeriu i ndeshjes Kasper Schmeichel, që ka treguar se është më i aftë se babai i tij në këtë punë, kurse Gareth Southgate me zëvendësimet e vonshme edhe njëherë tregoi se e ka tejet të qartë çka kërkon nga lojtarët e tij.
Pas golit të mrekullueshëm të Mikkel Damsgaard (30) nga gjuajta e lirë - gol i parë që Anglia e pranoi në kampionat dhe barazimit të shpejtë të Anglisë (Simon Kjaer ag. 39) ka qenë një lëvizje mashtruese e Raheem Sterling - që çoi në penallti, ndërsa kapiteni Harry Kane edhe pse në mundësinë e dytë - shënoi për fitore (104) pasi që penalltinë e tij e mbrojti Kasper Schmeichel, derisa sulmuesi i Tottenham topin e rikthyer e shtyu në portë për fitore, 2-1.
Minutat e mbetura të ndeshjes treguan fuqinë e Anglisë. Nuk i dhanë rast danezëve, e as topin. Kontrolluan gjithçka në minutat e mbetura, ndërsa edhe mundësitë që do të çonin në gol, u qetësuan nga vetë lojtarët për të mbajtur topin dhe për të përfunduar 120-minutat me fitore.
Anglia fiton. Arrin historinë me fitore 2-1. Ndërsa Gareth Southgate tashmë lirshëm mund të quhet trajneri më i suksesshëm anglez i evropianeve. Anglia arrin për herë të parë finalen e EUROs, ndërsa në finale e pret Italia e Roberto Mancinit. Më 11 korikk, të dielën në Wembley.