Shkëmbi tregon problemet serioze te Liria!

Trajneri korçar i Lirisë, Bledi Shkëmbi, ka treguar problemet e mëdha që janë shfaqur te Liria ditët e fundit.

Përkundër fitores 1-0 ndaj Feronikelit sot, Shkëmbi ndër të tjera ka bërë të ditur se kishte ofruar dorëheqjen dy ditë më parë dhe sot ka qenë në ekip vetëm për të treguar unitetin e tij dhe të lojtarëve si dhe punën që është bërë aty për muaj të tërë.

“Kemi pasur shumë probleme, të cilat i kemi mbajtur brenda familjes sonë. Sot këta lojtarë kanë treguar se ne si ekip jemi të bashkuar dhe këta njerëz në kryesi nuk mund të prishin këtë punë që kemi bërë me muaj. Kemi pasur probleme prej kur u largua kryetari Mirsad Çollaku. Disa njerëz në kryesi zgjedhin që disa lojtarë t’i paguajnë e disa jo, duke krijuar një përçarje padashje në ekip dhe kjo nuk është gjë e mirë. Unë ka dy ditë që kam dashur të largohem nga ekipi dhe kam qëndruar këtu vetëm për hir të futbollistëve,” ka thënë Shkëmbi pas ndeshjes.

Përndryshe, Liria është duke përjetuar stinorin më të mirë prej se është kthyer në Superligë. Me Bledi Shkëmbin trajner, Liria është në krye të listës së ekipeve me mbrojtjen më të mirë në ligë, duke pasur 12 ndeshje pa pranuar gol nga 21 xhiro të zhvilluara.

Shiko: PORTAT E PAPREKURA

Fitorja e sotme ndaj Feronikelit me golin e Mevlan Zekës e ka dërguar Lirinë në pozitën e katërt në klasifikim. Ekipi bardhezi nga Prizreni xhiron që vjen, që i jep fund ciklit të dytë të përballjeve në Superligë, udhëton drejt Podujevës për t’u ndeshur me Llapin.