BERNARD CHALLANDES
E njoh dëshirën dhe zjarrin e popullit të Kosovës
2 March, 2018 @12:30
Selektori i ri i Kosovës, Bernard Challandes, në deklaratën e tij të parë për shtyp në detyrën e re, pasi që është prezentuar para gazetarëve, ka bërë të ditur se njeh dëshirat dhe zjarrin e Kosovës.
“E njoh shumë mirë dëshirën dhe zjarrin e popullit të Koosvës. Falemnderit për besimin! Kjo është sfidë e madhe për mua. Duhet të krijojmë familje të madhe ekipore. Më e rëndësishmja është tash që Kosova të jetë e bashkuar,” ka thënë fillimisht sot zvicerani 66 vjeçar, që më parë ka qenë selektor i Armenisë.
ORARI DHE TABELA - LIGA E KOMBEVE
Challandes ishte shkarkuar nga posti i trajnerit të Armenisë pas humbjes së pësuar nga Shqipëria në Elbasan Arena, kur kuqezinjtë e Gianni de Biasit atëherë, kishin kthyer rezultatin prej 0-1 në 2-1 për të shtuar gjasat për kualifikim drejt EURO 2016.
Krijimi i ekipit të madh - CHALLANDES
Zvicerani tash do të ulet në postin e lënë zbrazët nga selektori Albert Bunjaki, që u largua në tetor të vitit të kaluar.
“Sot nuk do të flas për kualifikimet, por vetëm për krijimin e ekipit të mirë. Duhet të krijojmë ekip të madh, ka shqiptarë kosovarë që luajnë jashtë dhe është detyrë e jonja që t’i ftojmë ata. Me zgjedhje të mirë individuale do të arrijmë ekip që duam,” ka thënë ndër të tjera ai.
Challandes pritet që shpejt të publikojë listën e të ftuarve për miqësoret e marsit, ndërsa Telegrafi ditë më parë ka bërë të ditur se rroga mujore e tij do të jetë 20 mijë euro në muajt e parë dhe nëse arrin rezultate të mira ajo mund t’i shtohet edhe për 10 mijë tjera në vazhdim të kontratës, pasi që 66 vjeçari ka nënshkruar kontratë 2 + 2 vjeçare me FFK-në.