Shqipëria U21 pengon Kosovën U21 në rrugëtim drejt evropianit

Shqipëria U21, duke e mposhtur Kosovën U21 me rezultat 2-1, ka shënuar fitoren e parë në Grupin 3 në kuadër të kualifikimeve drejt Euro 2021.

Kosova U21 kështu merr thua nga një pengesë e papritur në rrugëtim drejt evropianit të të rinjve, derisa shpresat kuqezinj festuan fitoren e parë në grup.

Pjesa e parë e ndeshjes përfundoi pa gola 0-0, derisa në pjesën e dytë u shënuan 3 gola.

Së pari në minutën e 72’, lojtari i Kosovës Valdrin Mustafa nuk arriti të shënojë në portën e zbrazur afër 2 metrave, derisa 4 minuta më vonë erdhi goli i Shqipërisë.

Pas një harkimi të Arbnor Muçollit në zonë, Shaqir Tafa ishte i vetmuar dhe shënoi pa problem.

Në minutën e 81’, mbrojtësi i Kosovës Arbenit Xhemajli reagoi dobët në mbrojtje dhe këtë e shfrytëzoi më së miri Arbnor Muçolli për ta dyfishuar rezultatin.

Fare në fund zëvendësuesi Blend Baftiu me kokë shënoi për 2-1, që doli të ishte rezultati përfundimtar i ndeshjes.

Kosova me 6 pikë mbetet në pozitën e tretë, kurse Shqipëria me 5 pikë gjendet në pozitën e katërt.

Shqipëria ndeshjen e radhës do ta luaj kundër Anglisë, kurse Kosova kundër Austrisë.