Skënderbeu me mungesa në Ukrainë

Edhe Skënderbeu sot do të luajë ndeshjen e Play-Offit të Europa League. Korçarët udhëtojnë për në Ukrainë në ndeshje ndaj Chernomorets të Odesës me mungesa të rëndësishme, por me shpresë që të arrijnë rezultat të mirë për ndeshjen e kthimit në Tiranë. 

Kapiteni i skuadrës dhe truri i saj, Blendi Shkëmbi, nuk ka arritur të shërohet nga lëndimi i pësuar në ndeshjen e fundit europiane dhe nuk ka udhëtuar fare me ekipin për në Ukrainë. 

Mungesë tjetër që dihej është edhe sulmuesi kryesor i skuadrës si dhe më i miri i stinorit të kaluar para portave kundërshtare  - kroati Pero Pejic. Pejic u ndëshkua me karton të kuq në fitoren e Skënderbeut në Ligë të Kampionëve ndaj Shakhter Karagandyt, që e detyron atë në suspendim. 

Në anën tjetër, ukrainasit po tentojnë që ta kryejnë punën si vendas dhe të mos diskutohet çështja e kualifikimit për në ndeshjen e kthimit. Ata janë në formë tepër të mirë aktualisht, pasi që javë më parë kanë arritur të befasojnë njërin ndër ekipet më të mira ukrainase, Dynamo Kiev, duke i mposhtur si mysafir 1-2. Nuk dihet nëse trajneri i tyre, Roman Grigorchuk, do të fusë në ndeshje dyshen shqiptare Kristi Vangjeli dhe Elis Bakaj, lojtarë këta që mbrojnë ngjyrat e ekipit ukrainas. Chernomorets është në formë të jashtëzakonshme pasi që në pesë ndeshjet e zhvilluara të këtij muaji nuk është mposhtur asnjëherë, duke zhvilluar ndeshje edhe në Europa League (ku eliminoi Crvena Zvezdën) dhe në kampionat (ku mposhti Dynamo dhe Arsenal të Kievit). 

Në anën tjetër, trajneri i korçarëve, Mirel Josa shpreson te mbrojtja e ekipit, që me koncentrim maksimal të ruaj portën sa më shumë që është e mundur që me rezultat potencialisht të favorshëm të kthehet në Shqipëri dhe t’i eliminojë në ndeshjen e kthimit. 

EUROPA LEAGUE, Play-Off