Superkupa spanjolle, sonte

Ish sulmuesi i Barcelonës, David Villa, do të paraqitet sonte për herë të parë kundër ish ekipit të tij. 

Atletico Madrid, i cili ka transferuar Villan gjatë këtij afati kalimtar nga Barcelona, pret kundërshtarin katalonas në Vicente Calderon në ndeshjen e parë të finales së Superkupës. 

“Do ta kemi vështirë, por do të tentojmë. Ata janë ekipi më i mirë në botë. Kanë lojtarin më të mirë në botë, Messi. Kanë lojtarin që mund të bëhet më i miri në botë, Neymar. Por ne do të provojmë,” ka thënë trajneri argjentias i Atletico Madrid, Diego Simeone para ndeshjes së sotme. 

Në anën tjetër, trajneri i ri i Barcelonës, Gerardo Martino, pas suksesit në ndeshjen e parë në La Liga ndaj Levantes, 7-0, ka thënë shkurt se te Barcelona nuk ka kalkulime. 

“Në Barcelonë nuk ka që të bësh hesape. Duhet të fitosh çdo ndeshje. Brenda, jashtë, kudo që luan; prandaj kjo është ajo që po kërkojmë ne. Fitore,” ka qenë i prerë Martino në fjalimin e tij para duelit të sotëm që fillon në ora 23:00. 

Barcelona është kampione aktuale e Spanjës, ndërsa Atletico Madrid pat arritur sukses të madh duke e mposhtur Real Madridin favorit në finale të Kupës së Mbretit. 

Superkupa e Spanjës për dallim nga vendet tjera, luhet me dy ndeshje, ku pas një jave luhet ndeshja e kthimit në Camp Nou të Barcelonës. 

SUPERKUPA SPANJOLLE