Synimet e reja të Arsenalit, në Swansea

Vetëm humbja nga Aston Villa 1-3 si vendas ka arritur të kthjellë sadopak Arsenalin para fundit të afatit kalimtar. Menjëherë pas disfatës poshtëruese dhe të papritur, Wenger është vërshuar nga kritikat dhe tashmë ai ka reaguar. 

Sipas The Evening Standard, Arsenal ka ngritur ofertën për mesfushorin françez të Newcastle United, Yohan Cabaye, prej 10 në 12 milionë funta - ndërsa si risi është duke diskutuar me drejtuesit e Swansea City që të transferojë dyshen: Michu-Ashley Williams. 

Sipas kësaj të përditshmeje, Arsenal planifikon që të paguajë 35 milionë funta për dyshen e Swansea. 

Në anën tjetër, Cabaye nuk ka qenë as në bankën rezervë të Newcastle mbrëmë në humbje ndaj Manchester Cityt dhe trajneri i laraskave Alan Pardew ka kritikuar drejtuesit e Arsenalit se po i destabilizojnë emocionalisht futbollistët pas fillimit të stinorit duke kërkuar që afati kalimtar të mbyllet para se t’ia fillojë stinori në Premier League. 

Arsenal kishte dështuar që të sjellë gjatë verës futbollistët e kërkuar: Gonzalo Higuain, Luiz Gustavo dhe Luis Suarez.