REY MANAJ TE BARCELONA
Transferi dhe reagimi i Manajt, pasi që e kërkoi Barcelona!
21 January, 2020 @0:10
Për shumë kë ishte befasi, por tashmë është zyrtare edhe nga ana e Barcelonës. Sulmuesi i Shqipërisë, Rey Manaj, është futbollist i ri i Barcelonës!
Sulmuesi 22 vjeç i lindur në Lushnjë pas një periudhe premtuese në rini, kur luajti për Interin disa ndeshje në ekip të parë, pati rënie drastike për të përfunduar deri në kategorinë e tretë italiane.
Sidoqoftë, ai punoi për tu ngritur dhe pas kalimit në Albacete të Spanjës, tash për 700 mijë euro dëmshpërblim u bë zyrtarisht lojtar i Barcelonës B.
Kontrata e tij është 5 vjeçare me katalonasit dhe Manaj do të vesh fanellën me numër 22 në ekip, derisa Albacete do të mund të përfitojë edhe 2 milionë euro tjera, varësisht nga performancat dhe ngritja e Manajt drejt ekipit të parë.
Barcelona është përkujdesur edhe të blindojë Manajn në ekip deri në qershor të vitit 2023, ku dëmshpërblimi për prishjen e kontratës së tij kushton 50 milionë euro!
Manaj ka debutuar për kombëtaren shqiptare më 13 nëntor të vitit 2015 në moshën 18 vjeçare.
Te Albacete Manaj ka shënuar tetë gola në 29 paraqitje.
Vetë oferta e Barcelonës ka bërë që Manaj të mos mendojë asgjë më tepër, kanë bërë të ditur mediat e atjeshme.
“Posa e pashë ofertën nga Barcelona, nuk dëshiroja të mendoja asgjë tjetër më,” citohet të ketë thënë Manaj.
Ekipi B i Barcelonës është duke kërkuar të ngritet nga Segunda B në Segunda Division dhe për këtë është duke shtuar forca në sulm.
E Manaj aty do të ketë në shoqëri edhe futbollistin e Kosovës, Labinot Kabashi, që me vite të tëra është pjesë e Akademisë së katalonasve.