Vëllaznimi fiton minimalisht ndaj Vllaznisë

Pas humbjes nga Llapi, Vëllaznimi e ka gjetur fitoren në miqësoren e luajtur ndaj Vllaznisë së Pozheranit në Gjakovë, takim i cili pati një numër të konsiderueshëm të shikuesve, marrë parasysh faktin që ishte vetëm një takim miqësor.

Pjesa e parë kaloi me pak raste për shënim nga ana e vendasve, ndërsa mysafirët e goditën shtyllën në fundin e pjesës së parë. Pak para shtyllës, një nga lojtarët e Pozheranit u ndëshkua me karton të kuq, mirëpo për shkak se ndeshja ishte e karakterit miqësor, Vllaznia nuk mbeti me një lojtar më pak, por lojtari i larguar nga fusha u zëvendësua me një tjetër.

Në pjesën e dytë gjakovarët e gjetën epërsinë përmes Dardan Rogovës, i cili shënoi pas një topi të rikthyer nga portieri mysafir. Ky gol në fillim u mendua të ishte pozicion jashtë loje, mirëpo më pas kryesori Kreshnik Vula dha shenjë që goli qëndron dhe gjakovarët kaluan në epërsi.

Në vazhdim të ndeshjes mysafirët nga Pozherani rrezikuan 2-3 herë, mirëpo barazimi nuk erdhi në asnjë moment dhe takimi u mbyll me rezultat 1-0.

Gjithashtu, për t’u përmendur nga ndeshja e sotme është debutimi i njërit nga brazilianët që është në provë te Vëllaznimi momentalisht.

Nesër me fillim nga ora 17:30, Vëllaznimi luan një miqësore tjetër, kësaj radhe ndaj Trepçës ‘89.