VËLLAZNIMI-DRENICA
Vula vulos, Vëllaznimi fiton
8 April, 2018 @15:58
Një gol i shënuar nga sulmuesi i Vëllaznimit, Lekë Vula, në minutën e 23-të të ndeshjes, ka mjaftuar për fitoren e rëndësishme të gjakovarëve sot.
Edhe pse Vëllaznimi ishte me dhjetë lojtarë në fushë, pasi që Altik Muhaxhiri kishte marrë karton të kuq direkt pas startit ndaj Kreshnik Ukës jashtë 16-shes, kjo nuk u pengoi fare nxënësve të Arsim Gojanit që të luajnë deri në fund pa kalkulime.
Vula shënoi për avantazhin 1-0, ndërsa Vëllaznimi vazhdoi me lojë të mirë. Drenica edhe pse tentoi, nuk pati ndonjë rast konkret, derisa erdhi penalltia.
E penalltinë e Drenicës dështoi ta shënojë sulmuesi më i mirë i këtij stinori te ekipi nga Skenderaj, Genc Hamiti. Hamiti shutoi jashtë portës, ndërsa Vëllaznimi menaxhoi lojën si duhet deri në fund, për tre pikë - që do të mund të luajnë rol kyq në shpëtimin përfundimtar të gjakovarëve, pa pasur nevojë për Play-Out.
