Vushtrria e rënë, ndal Flamurtarin

Vushtrria që në xhiron e kaluar edhe matematikisht ra nga elita e futbollit të Kosovës, sot ka bërë befasi duke fituar pikën e parë në futbollin post-pandemik, duke barazuar ndaj Flamurtarit 2-2 [Drilon Fazliu 11, Sie 41 - Arbnor Zeqiri 7, Torvioll Stullqaku].

Kjo ndeshje, që në bastoret e ndryshme botërore në fillim ka pasur koeficient 1.72 për fitoren e Flamurtarit dhe më pas ra në 1.14, sot para ndeshjes është larguar krejtësisht si mundësi për tu luajtur (xtip.de).

Mirëpo, i kthehemi ndeshjes dhe befasi tjetër është që të katër golat e takimit u shënuan në pjesë të parë, kur Arbnor Zeqiri i dha epërsinë e shpejtë kuqezinjëve mysafirë (7’) 0-1 duke goditur nga distanca, pasi që Adem Maliqi pasoi bukur.

Por shpejt Drilon Fazliu i vendasve barazoi duke shfrytëzuar një pakujdesi të mbrojtjes vendase 1-1 (11’).

TABELA AKTUALE

Dy raste tjera të mira për Vushtrrinë me Baton Zabërxhën (12’) dhe Okonwon (17’), ndërsa Donat Hasanaj i Flamurtarit (14’) tentoi rrufeshëm por pasaktë.

Sidoqoftë, Flamurtari gjeti golin. Torvioll Stullqaku pas një kombinimi të mirë ekipor në fazën e sulmit, gjeti rrjetën e Marly Prince të Vushtrrisë për 1-2 (36’).

Dhe njëjtë, pa vonuar shumë Vushtrria barazoi me një gabim të portierit Ardit Nika në portën e Flamurtarit, kur senegalezi Sie qëlloi për 2-2 (41’).

Në pjesë të dytë u shënuan dy raste të mira për Flamurtarin me Stullqakun në formë (54’ dhe 60’). Gol s’kishte më. Kah fundi i ndeshjes, ndërprerje të shumta, si për shkak të kartonëve të verdhë ashtu edhe për shkak të ndërrimeve të lojtarëve, për përfundimtaren 2-2.

Në xhiron që vjen Flamurtari pret Dukagjinin ndërsa Vushtrria i shkon Trepçës’89.