Daku rikthehet në elitën kroate

Futbollisti i kombëtares së Kosovës, Mirlind Daku, që ka përfunduar stinorin e shkuar në Superligë të Kosovës si golashënues më i mirë i kampionatit është përshëndetur sot nga ekipi i tij, Ballkani.

Daku, që ndihmoi mjaft Ballkanin me golat e tij, kryesisht në pjesë të parë të stinorit dhe shënoi rekord të golave të shënuara për stinor në Superligë, do të rikthehet në Osijek të Kroacisë, lojtar edhe i të cilit ekip është.

Ai ka qënduar si huazim këtë stinor te Ballkani, pasi që ishte huazuar më parë nga Osijeku te Kukësi e prej aty kaloi te suharekasit.

“Faleminderit Suharekë. Kam kaluar një vit e gjysmë shumë të mirë në Suharekë si pjesë e klubit fantastik FC Ballkani. Tani është koha për një aventurë të re, ku do të rikthehem te Osijek pasi huazimi më ka përfunduar. Dua të ju falënderojë të gjithëve për mikpritjen dhe mbështetjen e madhe që ma keni dhënë gjatë kësaj kohe. Faleminderit presidentit Arsim Kabashi, gjithë kryesisë, trajnerëve që kisha, bashkëlojtarëve dhe tifozëve Xhebrailat. Faleminderit dhe mirupafshim Suharekë,” ka shkruar Daku në njoftimin e tij botuar në llogarinë e tij personale të Facebookut sot.