Drita gati për Ligë të Kampionëve

Kampionia e fundit e Kosovës, Drita, është gati për Ligë të Kampionëve. Ekipi nga Gjilani sot ka postuar fotografinë me gjithë futbollistët dhe stafin që pritet të marrin rrugë drejt Gjibraltarit, ku do të debutojnë në gara ndërkombëtare, saktësisht fazën preliminare të Ligës së Kampionëve.

Drita do të duhet të kalojë fazën preliminare për të kapur fazën e parë kualifikuese të Ligës së Kampionëve. Bardhekaltërit kampionë, në përballjen e parë të tyre takohen me ekipin nga Andorra, Santa Coloma.

Ndeshja Santa Coloma - Drita zhvillohet më 26 qershor me fillim në ora 17:00. Nëse Drita eliminon Santa Colomën do të takohet në finale të fazës preliminare me fituesin e përballjes që luhet në të njejtën ditë, por në ora 21:00 Florita (SMR) - Lincoln (GIB).

Finalja e fazës preliminare zhvillohet më 29 qershor me fillim në ora 20:30.

Sidoqoftë, Drita ka të sigurtë edhe një ndeshje në Europa Ligë, edhe nëse eliminohet në gjysmëfinale ose finale të fazës preliminare të Ligës së Kampionëve.