Ekuadori ndalë serinë e Brazilit për tu kualifikuar

Barazimi i Ekuadorit në mëngjesin e hershëm sot, i ka siguruar “kondorëve” kualifikimin në çerekfinale të Copa America 2021, duke e ndalë serinë e fitoreve të Brazilit me 1-1 [Militao 37 - Mena 53] përfundimtare.

Brazili deri sot ka qenë në një seri të fitoreve që numëronte 10 ndeshje, por skuadra e drejtuar nga Tite u ndalë me barazim edhe pse nuk rrezikoi lidershipin e Grupit B të Copa America 2021.

Me këtë ndeshje edhe ka përfunduar pjesa grupore e Copa America 2021 për Grupin B, ku çerekfinalen e kanë siguruar Brazili, Peruja, Kolumbia dhe Ekuadori, derisa Venecuela është eliminuar.

Me përballjet e natës së sotme, do të përfundojë edhe Grupi A ku skuadrat do të mësojnë renditjen përfundimtare dhe njëkohësisht edhe kudnërshtarin e çerekfinales në garë. Aktualisht Argjentina me 7 pikë është e para në Grupin A, me një më shumë sesa Paraguaji, Kili është me 5 ndërsa Uruguaji me 4. Bolivia është eliminuar, por përballjet e fundit do të përcaktojnë renditjen përfundimtare në Grupin A.

Takohen: Uruguaji-Paraguaji dhe Bolivia-Argjentina.