PRISHTINA 2-0 DUKAGJINI
Korenica e Abazi vendosin, Dallku 100%
25 September, 2019 @20:21
Prishtina ka shënuar fitoren e tretë me radhë të stinorit pas startit të dobët. Bardhekaltërit sonte kanë zhvilluar ndeshjen e shtyer të xhiros së dytë të stinorit ndaj Dukagjinit dhe kanë mposhtur të rikthyerit në Superligë me rezultat 2-0, me nga një gol të shëunar në secilën pjesë.
Golat erdhën në fillim të çdo pjesëloje, për t’i shuar mundësitë dhe demotivuar ekipin kundërshtar për të bërë më shumë në ndeshje.
Në fillim, ka qenë gjakovari i ardhur këtë verë në ekipin e Prishtinës, Tun Bardhoku, që ka asistuar për Meriton Korenicën, që ka tundur rrjetën e Flamur Nezirit që në minutën e shtatë të ndeshjes (1-0, 7’).
Dukagjini tentoi të barazojë, por në anën tjetër Diar Miftaraj e Meriton Korenica vazhduan të rrezikojnë portën e tyre, për të përfunduar pjesa e parë me 1-0.
E në fillim të pjesës së dytë, Prishtina përsëri shënoi. Armend Thaqi asistoi kësaj radhe, ndërsa Leonit Abazi tundi rrjetën e Nezirit për herë të dytë në ndeshje, duke shënuar për 2-0, 51’.
Trajneri i Dukagjinit bëri zëvendësim të dyfishtë për të tentuar së paku golin këtë stinor, pasi që ekipi i tij ende nuk ka shënuar gol në Superligë!
Mark Milicaj dhe Demiri dolën, derisa Marmullaku e Granit Elezaj u futën në lojë. Vetë trajneri Rexhepi u ndëshkua me karton të verdhë nga gjyqtari, ndërsa rastet për hithat erdhën, por jo të kurorëzohen me gol.
Kanë qenë Granit Elezaj, pastaj Jeton Dushi që kanë provuar më seriozisht, por porta e Visar Bekajt mbeti e paprekur dhe kështu mysafirët u pajtuan me humbje.
Në anën tjetër, Prishtina tash me tre fitore radhazi futet në lojë për kreun, që edhe e ka qëllim, ndërsa trajneri Dallku ka bilanc të 100%-të me bardhekaltërit, pasi që shënoi dy fitore në dy duelet e para si trajner.
Dukagjini, i fundit në klasifikim, me një pikë të vetme dhe pa gol të shënuar, tashmë ka nis të mbetet larg ekipeve tjera, me 11 gola të pranuara në llogari.