Les Herbiers ndalet, Parisi kompleton tripletën

Skuadra që u bë senzacion në Francë e më gjërë, Les Herbiers, më në fund është ndalur.

KALUAN DHJETË RAUNDE

Ekipi i Ligës së Tretë franceze që kaloi dhjetë xhiro të Kupës për të arritur në finale, është mposhtur sonte nga PSG 2-0, ku këta të fundit kompletuan tripletën në Francë nën drejtimin e Unai Emeryt.

KREJT QYTEZA NË STADIUM!

Les Herbiers përndryshe, ka shitur 15 mijë bileta për këtë ndeshje, e vjen nga qyteza me afro 16 mijë banorë, që do të thotë se e tërë qyteza ka qenë në ndeshje!

E te llogaritë financiare të klubeve - më intersantja ka qenë: Buxheti vjetor i Les Herbiers do të mund të paguajë vetëm 16 ditë të kontratës vjetore të Neymarit me Paris St Germainit.

PREJ 217 NË 73772!

Ndeshjen e xhiros së parë të Kupës, Les Herbiers e luajti para 217 vetave në tetor të vitit të kaluar - e misionin në Kupë e përfundoi para 73 mijë e 772 tifozëve në Stade de France.

Sa i përket ndeshjes, golat për Parisin i shënuan Giovani Lo Celso (26’) dhe Edinson Cavani (74’) nga penalltia.

SYNIM MBIJETESA

E ekipi i drejtuar nga Stephane Masala, do t’i kthehet detyrave në Ligë të Tretë, ku duhet të fitojnë patjetër në xhiron e radhës, për të siguruar mbijetesën - në të kundërtën do të jenë pjesë e Ligës së Katërt franceze në stinorin e radhës, ku bën pjesë edhe ekipi rezervë i PSG-së.