Me 3-shen e radhës, Italia kualifikohet në 1/8 e finales

Lojë briliante nga Italia dhe fitore përsëri me tre gola të shënuara, për të siguruar kualifikimin ekspres për në të tetën e finales së EURO 2020.

Një Itali që më parë s’është parë në histori të evropianeve, pasi që dy herë radhazi shënojnë nga 3 gola për ndeshje dhe me fitoren e sontme ndaj Zvicrës, skuadra e drejtuar nga Roberto Mancini ka siguruar kualifikimin në fazën eliminatore të garës.

TABELA AKTUALE dhe ORARI

Kujtojmë, Italia ende s’ka pranuar gol në EURO 2020, ndërsa me nga 3 për ndeshje, po tregohet si fuqi për tutje.

Manuel Locatelli ka shënuar për epërsinë e azzurëve në pjesë të parë pas asistimit të Domenico Berardit, ndërsa në pjesë të dytë ka vulosur dominimin me një goditje jashtë 16-metërshit për 2-0.

Krejt në fund, pas 2 tentimeve, në të tretën Ciro Immobile shënoi golin përfundimtar të ndeshjes për 3-0 finale [Locatelli 26, 52, Immobile 89].

Zvicra në anën tjetër me vetëm një rast konkret, ndërsa në pjesën më të madhe të ndeshjes ishte duke kërkuar se si të arrijë te topi për të bërë më shumë. Granit Xhaka me disa qarkullime topi, e Xherdan Shaqiri me një tentim të mirë, por të bllokuar dhe dy shuta mbi portë, me kaq do të tentojnë që përmes ndeshjes së fundit ndaj Turqisë të shpresojnë të jenë në mesin e të kualifikuarve.