Milan po shikon mundësinë për afrimin e James

Pas humbjes së 10-shes, Hakan Çalhanoglu, skuadra e Milanit është duke kërkuar një lojtar tjetër që do të mund të zëvendësojë turkun në atë pozitë.

Dhe, sipas disa raporteve nga mediat e ndryshme të afërta me ekipin rossoner, duket se interesimi i klubit nga qyteti i modës është fokusuar te 10-shja kolumbiane, James Rodriguez.

Rodriguez, që në stinorin e kaluar luajti në Premier League me Evertonin, me largimin e Carlo Ancelottit duket se nuk do të dëshirojë të mbetet aty.

Ndërkaq Milan, pasi që nuk arriti ta mbajë Hakanin, që shkoi te rivali lokal Inter, është duke shikuar mundësitë për transferimin e lojtarit, por së pari po shqyrton huazimin me mundësi blerjeje.

Gazetari i ESPN, Vito de Palma, ka bërë të ditur se marrëveshja është afër me lojtarin dhe mbetet të shihet deri në ditët në vijim, nëse palët do të dakordohen për kalimin e kolumbianit që ka luajtur edhe për Real Madridin, te Milan.