Mjeshtria e Messit siguron gjysmëfinalen për Gauchosët

Argjentina ka arritur që të sigurojë gjysmëfinalen e Copa America 2021 në mëngjesin e hershëm sot, duke mposhtur Ekuadorin 3-0 [Rodrigo de Paul 40, Lautaro Martinez 84, Lionel Messi 90+3].

Pas një huqjeje të madhe në fillim të ndeshjes, i vetëm para portierit Leo Messi nuk arriti të shënojë. Por, kjo nuk e uli entuziazmin dhe ai shpejt bëri gjithçka për skuadrën për të siguruar gjysmëfinalen.

Ylli i Barcelonës, Lionel Messi, ka shkëlqyer në këtë ndeshje, duke dhuruar dy asistime për bashkëlojtarët e tij dhe duke e shënuar një gol nga gjuajtja e lirë në fund të takimit, për të përcaktuar rezultatin final të ndeshjes.

Messi së pari ka gjetur Rodrigo de Paulin për epërsinë fillestare dhe pushim të qetë 15-minutësh mes pjesëve, ndërsa kur u afrua fundi i ndeshjes dha topin për Lautaro Martinezin e Interit për të vulosur kualifikimin, ndërsa krejt në fund magjinë ia la vetes, për një briliancë nga gjuajtja e lirë.

Me fitore, Argjentina tashmë do të del përballë Kolumbisë në gjysmëfinale të garës, më 6 korrik në Brasilia për të kërkuar finalen e Copa America 2021.