Penalltitë përcaktojnë gjithçka

Skuadra pejane, Besa, e cila mezi ia nisi stinorit pas ikjes së sponsorit kryesor ka arritur të regjistrojë fitoren e parë në këtë stinor duke e mposhtur Hajvalinë mjaft të përforcuar 1-0. 

Golin e vetëm në ndeshje e shënoi mesfushori me përvojë Mensur Duraku nga penalltia, pasi që më parë portieri mysafir kishte rrëzuar sulmuesin veteran Haxhi Zeka në zonë. 

Në ndeshje u regjistruar edhe një incident kur pas kacafytjes u përjashtuan Armend Kastrati i Hajvalisë dhe Egzon Gashi i Besës. 

DRENICA GJITHASHTU ME PENALLTI ARRIN FITOREN

Drenica ka arritur fitoren e parë në kampionat me mjaft mund dhe atë vetëm falë penalltisë së akorduar në minutat e fundit të ndeshjes nga gjyqtari Hajriz Hajdari. 

Ka qenë kapiteni i drenicakëve, Sami Geci, që ka realizuar penalltinë me të cilën Drenica ka marrë tre pikët e para të stinorit, përkundër se Trepça sipas rasteve ka qenë më e mirë ku u dallua Visar Shkupolli, por në fund ai ka qenë njeriu i cili shkaktoi penalltinë që çoi te humbja e ekipit të tij. 

FUSHË KOSOVA ARRIN PIKËN E PARË

Përkundër dominimit në pjesën e parë, Fushë Kosova, nuk ka arritur të shënojë dhe 45 minutëshi i parë çoi skuadrat në zhveshtore me rezultat të barabartë. 

Mirëpo, pjesa e dytë nisi me një iniciativë të mysafirëve nga Gjilani të cilët falë kondicionit arrinin të krijonin lehtë, me ç‘rast edhe shënuan nëpërmjet sulmuesit më të mirë të tyre, Ismet Ramushi (56’). 

Por epërsia e gjilanasve nuk zgjati shumë. Vetëm tre minuta më vonë, gjyqtari prishtinas akordoi penallti për vendasit debutues në Superligë të cilët barazuan nëpërmjet Burim Shalës në 1-1, që doli të jetë edhe rezultati përfundimtar i takimit.

Rezultatet dhe tabelën aktuale shikojeni këtu.