JOSE MOURINHO
SShot/ LaGazzettaDelloSport
Perandori i ri i Romës
5 May, 2021 @9:58
La Gazzetta dello Sport ka zbardhur sot me ballinën kuqeverdhë të ngjyrave të Romës, pasi që dje u zyrtarizua aty trajneri i njohur portugez, Jose Mourinho.
Mourinho, që muajin e kaluar u largua nga Tottenham, ka arritur marrëveshje të drejtojë Romën nga fillimi i stinorit të ardhshëm.
“Ave Mou” ka shkruar ballina e gazetës më prestigjioze sportive italiane, ndërsa portugezi ka nënshkruar deri në fund të stinorit 2023/24 me giallorossët.
“Pasioni i jashtëzakonshëm i tifozëve më bindi të pranoj këtë detyrë. Mezi presi fillimin e stinorit të ri. Daje Roma!” — është cituar të ketë thënë Mourinho.
Roma po përgatitet të bëj “luftë” të madhe ndaj treshes veriore dominuese në Itali dhe këtë po tenton t’ia nis me trajnerin e ri.
“Ai është kampion. I jashtëzakonshëm. Ai do të na jep shumë,” — ka thënë Dan Friedkin, pronari amerikan i ekipit të kryeqytetit italian.
Roma këtë stinor nuk e ka kaluar mirë nën drejtimin e Paulo Fonsecas. Ekipi është aktualisht i shtati në renditjen tabelare dhe nuk ka siguruar garat evropiane.
Te Roma luan reprezentuesi i kombëtares shqiptare, Marash Kumbulla.
