Ramadani zyrtarizohet trajner i ri, i ish-skuadrës

Trajneri që bëri Trepçën’89 kampion për herë të parë në histori të klubit, Zekirija Ramadani, është emëruar trajner i ri i Shkupit, ka bërë të ditur faqja zyrtare e këtij ekipi.

Ramadani, që përpos Trepçës’89 në Kosovë drejtoi edhe Ferronikelin, në kohët e fundit ishte i papunë, ndërsa pasi që Shkupi kishte shkarkuar trajnerin Ardian Nuhiu, gjithçka u përputh.

“Skuadra e Shkupit pas shkarkimit të trajnerit Ardian Nuhiu, edhe pse kishte disa oferta për trajner të ndryshëm vendor dhe ndërkombëtar, është vendosur që detyrën e trajnerit t’ia besoj Zekirija Ramadanit, i cili u pa si më i përshtatshmi që të udhëheq me ekipin, duke marrë parasysh se e njeh mirë skuadrën me të cilin u rrit si futbollist, por edhe punoi me për dy vite (2014-2016),” ka bërë të ditur njoftimi i klubit shkupjan, fcshkupi.com.

Ramadani ka nënshkruar kontratë 1.5 vjeçe me Shkupin.

Përndryshe, Shkupi është i katërti në elitën e futbollit maqedonas me 29 pikë nga 23 xhiro. Lidere në Maqedoni është Shkëndija me 59 pikë nga 23 xhiro.