Rehatohet situata, Higuain në Chelsea

Gonzalo Higuain më në fund u bë i Chelseat. Pas javëve me negociata dhe një cikli ku Alvaro Morata duhej të kalonte prej Chelseat në Atletico Madrid, e Krysztof Piatek nga Genoa te Milan - Higuain arriti në Stamford Bridge.

Argjentinasi 31 vjeçar do të bashkohet me trajnerin e tij të dikurshëm te Napoli Maurizio Sarri, me të cilin kishte shënuar rekord gola për një stinor në Serie A, 36 (2015/16).

Së fundi, Higuain ishte i huazuar te Milan nga Juventus, për të cilët shënoi tetë gola në 22 ndeshje.

Milan kishte marrë si huazim Higuainin prej Juventusit me 18 milionë euro pagesë vjetore huazimi dhe 36 milionë euro për opcionin e blerjes.

Tash, pasi që lojtari në gjysmë të stinorit u largua nga Milan, shumën prej 9 milionë eurove në drejtim të Juventusit pritet ta paguajë Chelsea, që gjithashtu ka kërkuar që tash huazimin edhe për 6 muaj tjera shtesë të argjentinasit.

Higuain do të bart fanellën me numër 9 te Chelsea. E tash, Morata pritet të lirohet drejt Atleticos.