MALI I ZI
Rivali i Kosovës emëron trajner boshnjak
25 July, 2019 @14:48
Pas barazimit 1-1 me Kosovën në ditën skandaloze për futbollin malazez, kur selektori i tyre serb bashkë me futbollistët me origjinë serbe aty, nuk pranuan të shfaqen në përballje ndaj vendit tonë - Mali i Zi mbeti pa selektor.
Largimi i Ljubisa Tumbakovicit, tërësisht politik, dhe zëvendësimi i tij nga ndihmësi malazez, sot përfundoi për Federatën e Futbollit të këtij vendi.
Mali i Zi ka përzgjedhur selektorin e ri dhe e ka zyrtarizuar marrëveshjen me boshnjakun Faruk Hadzibegic. Për gjeneratat e vjetra, Hadzibegic është një ish lojtar shumë i njohur në trevat jugosllave, që ka qenë ndër të paktit që ka dalë jashtë vendit.
Ai në karrierën e tij ka luajtur për Sarajevën, Betisin, Sochauxnë dhe Toulousein. Ndërkaq si trajner ka drejtuar disa skuadra turke, franceze dhe së fundi ka qenë trajner i Crvena Zvezdës së Beogradit.
Hadzibegic aktualisht është 61 vjeç dhe me përvojën e tij pritet të bëj gati ekipin malazez për ta nxjerrë nga fundi i tabelës së Grupit A kualifikues për EURO 2020.
Mali i Zi ndeshjen e radhës do ta luajë ndaj Çekisë, ndërsa do të jetë mysafir në Prishtinë më 14 tetor 2019.