UEFA rrit shpërblimet për Ligën e Kombeve

UEFA ka ngritur përfitimet e skuadrave pjesëmarrësë në Ligë të Kombeve. Prej Ligës A deri në Ligën D, të gjitha shpërblimet janë rritur në kuotën prej 50 përqind më shumë sesa që është thënë në fillim, ka bërë të ditur UEFA-ja sot.

Kështu, marrim shembull Kosovën që bën pjesë në Ligën D. Shpërblimi prej 500 mijë eurove sa ka qenë për pjesëmarrje në këtë garë, tash është bërë 750 mijë euro. Kjo do të jetë shuma që do të arkëtojë FFK-ja pa marrë parasysh ku përfundon Kosova në grupin e saj.

Por, shpërblimet nuk përfundojnë këtu. Shpërblimi është ngritur edhe për fituesit e çdo grupi në të gjitha ligat e Ligës së Kombeve.

Shiko: TË GJITHA GRUPET E LIGËS SË KOMBEVE

Përshembull, nëse Kosova e fiton grupin e saj, ajo do të fitojë edhe 750 mijë euro tjera, që do të çojë përfitimin e FFK-së në total në 1.5 milionë euro.

E njejta mënyrë, shkon edhe në Ligat tjera të kombeve, por me shumë më të madhe. Përshembull, Shqipëria që luan në Ligën C, do të mund të përfitojë maksimalisht (nëse përfundon e para, përveç pjesëmarrjes) 2.25 milionë euro. Në Ligën B fituesi i çdo grupi bashkë me pjesëmarrje maksimalisht përfiton 3 milionë euro. E në Ligën A, shuma shkon në 4.5 milionë euro.